காங்கிரஸ் செய்தி தொடர்பாளர் குஷ்பு சென்னையில் நிருபர்களுக்கு பேட்டி அளித்தார். அவர் கூறியதாவது:
தி.மு.க. கூட்டணியில் காங்கிரஸ் கட்சி சேர்ந்துள்ளது. இன்னும் பல கட்சிகள் இந்த கூட்டணியில் இணைய உள்ளன. தி.மு.க. கூட்டணியில் தே.மு.தி.க.வும் சேரும் என்ற நம்பிக்கை உள்ளது.
மத்திய மந்திரி ஜவடேகர் பா.ஜனதா கூட்டணிக்கு வருமாறு விஜயகாந்துடன் பேசி உள்ளாரே?
தே.மு.தி.க. பா.ஜனதா கூட்டணிக்கு நிச்சயம் போகாது. இதில் ஜவடேகர் ஏமாற்றம் அடைவார். அவர் அடுத்த முறை பேச்சு வார்த்தை நடத்த சென்னை வருவதற்குள் தி.மு.க. கூட்டணிக்கு தே.மு.தி.க. வந்து விடும். தே.மு.தி.க. தலைவர் விஜயகாந்த் விரைவில் நல்ல முடிவை எடுப்பார்.
காங்கிரஸ் கட்சியில் தனித்தனி கோஷ்டியாக செயல்படுகிறார்களே? கூட்டணியில் இது பாதிப்பை ஏற்படுத்துமா?
தனித்தனி கோஷ்டி இருந்தாலும் கட்சிக்கு எது நன்மை, எது நல்லது என்று தெரியும். அதை நோக்கி நாங்கள் பயணிப்போம்.
முதல்–அமைச்சர் ஜெயலலிதா ஆர்.கே.நகர் தொகுதிக்கு சென்று புதிய திட்டங்களை தொடங்கி வைத்துள்ளாரே?
தனது தொகுதி என்ற அடிப்படையில் முதல்–அமைச்சர் ஆர்.கே.நகர் தொகுதிக்கு சென்று திட்டங்களை தொடங்கி வைத்துள்ளார். இவ்வாறு குஷ்பு கூறினார்.
